Liver Damage by alcohol: ఆల్కహాల్ కాలేయాన్ని అనేక విధాలుగా దెబ్బతీస్తుంది. ప్రధానంగా ఎక్కువ మోతాదులో తాగడం, దీర్ఘకాలిక వినియోగం వల్ల లివర్ దెబ్బతింటుంది. ఆల్కహాల్‌ను శోషించడంలో కాలేయం కీలక పాత్ర పోషిస్తుంది. అయితే ఆల్కహాల్‌ను ఎక్కువ పరిమాణంలో లేదా ఎక్కువ కాలం తీసుకున్నప్పుడు, అది వివిధ కాలేయ సమస్యలకు దారి తీస్తుంది. ఆల్కహాల్ కాలేయాన్ని ఎలా దెబ్బతీస్తుందో ఇక్కడ తెలుసుకోండి. అలాగే లివర్‌ను రక్షించడానికి తీసుకోవాల్సిన జాగ్రత్తలు తెలుసుకోండి.
1. ఫ్యాటీ లివర్ (ఆల్కహాలిక్ స్టీటోసిస్): అధికంగా ఆల్కహాల్ తీసుకోవడం వల్ల కాలేయ కణాలలో కొవ్వు పేరుకుపోయి ఫ్యాటీ లివర్ వ్యాధికి కారణమవుతుంది. మద్యం సేవించడం మానేస్తే లివర్ సాధారణ స్థితికి చేరుకునే అవకాశాలు మెండుగా ఉన్నాయి.
2. ఆల్కహాలిక్ హెపటైటిస్: ఇది ఆల్కహాల్ వల్ల కలిగే కాలేయం వాపు. దీని లక్షణాలు కామెర్లు (చర్మం, కళ్ళు పసుపు రంగులోకి మారడం), కడుపు నొప్పి, జ్వరం కలిగి ఉండవచ్చు. ఆల్కహాలిక్ హెపటైటిస్ తీవ్రమైనది. ప్రాణాంతకమైనది కూడా. అందువల్ల దీనికి వైద్య చికిత్స అవసరం.
3. లివర్ సిర్రోసిస్: దీర్ఘకాలికంగా, ఎక్కువ మోతాదులో ఆల్కహాల్ తీసుకోవడం వల్ల లివర్ సిర్రోసిస్ వస్తుంది. ఇది కాలేయ కణజాలాన్ని పూర్తిగా దెబ్బతీస్తుంది. సిర్రోసిస్ కూడా కోలుకోలేని అనారోగ్య పరిస్థితి. అంతిమంగా కాలేయ వైఫల్యానికి దారితీస్తుంది. సిర్రోసిస్ లక్షణాల్లో అలసట, పొత్తికడుపు వాపు, గందరగోళాన్ని కలిగి ఉండడం వంటివి ముఖ్యమైనవి.
ఆల్కహాల్ వల్ల నష్టం నుండి లివర్ రక్షణకు జాగ్రత్తలు
1. మితంగా త్రాగండి: మీరు ఆల్కహాల్ తీసుకోవాలని భావిస్తే మితంగా తీసుకోండి. మహిళలకు రోజుకు ఒక డ్రింక్, పురుషులకు రోజుకు రెండు డ్రింక్స్ వరకు తాగొచ్చని వైద్యులు చెబుతారు. ఇక్కడ డ్రింక్ అంటే విస్కీ అయితే అది 30 ఎంఎల్ పరిమాణంగా భావించగలరు.
2. అతిగా తాగడం మానుకోండి: అతిగా తాగడం అంటే పురుషులు తక్కువ వ్యవధిలో ఐదు లేదా అంతకంటే ఎక్కువ డ్రింక్స్, స్త్రీలు అయితే నాలుగు లేదా అంతకంటే ఎక్కువ పానీయాలు తీసుకోవడం అతిగా తాగడం కిందికి వస్తుంది. ఇది కాలేయం దెబ్బతినే ప్రమాదాన్ని గణనీయంగా పెంచుతుంది.
3. విరామాలు తీసుకోండి: మద్యపానానికి దూరంగా ఉండటం వల్ల మీ కాలేయం మితమైన మద్యపానం వల్ల కలిగే ఏదైనా నష్టం నుండి కోలుకోవడానికి సహాయపడుతుంది.
4. ఆరోగ్యకరమైన ఆహారం తీసుకోండి: పండ్లు, కూరగాయలు, తృణధాన్యాలు అధికంగా ఉండే సమతుల్య ఆహారం తీసుకోవడం కాలేయ ఆరోగ్యానికి తోడ్పడుతుంది. అధిక చక్కెర, అధిక కొవ్వు, ప్రాసెస్ చేసిన ఆహారాలకు దూరంగా ఉండటం కూడా ప్రయోజనకరం.
5. హైడ్రేటెడ్ గా ఉండండి: మీ కాలేయం ఆల్కహాల్, టాక్సిన్‌లను మరింత సమర్థవంతంగా ప్రాసెస్ చేయడంలో సహాయపడటానికి పుష్కలంగా నీరు త్రాగండి.
6. మందులతో ఆల్కహాల్ కలపడం మానుకోండి: ఆల్కహాల్ అనేక మందులతో సంకర్షణ చెందుతుంది. కాలేయం దెబ్బతినే ప్రమాదాన్ని పెంచుతుంది. అందువల్ల వైద్య సలహా తీసుకోకుండా మీరు ఔషధాలు, ఆల్కహాల్ కలిపి తీసుకోరాదు.
7. రెగ్యులర్ వ్యాయామం: ఆరోగ్యకరమైన బరువు ఉండేలా చూసుకోవడం, క్రమం తప్పకుండా శారీరక శ్రమలో పాల్గొనడం లివర్ ఆరోగ్యాన్ని ప్రోత్సహిస్తుంది.
8. మీకు కాలేయ వ్యాధి ఉన్నట్లయితే ఆల్కహాల్‌ను పరిమితం చేయండి: మీకు కాలేయ వ్యాధి లేదా కాలేయ సమస్యల చరిత్ర ఉన్నట్లయితే, మీ కాలేయం దెబ్బతినే అవకాశం ఉన్నందున ఆల్కహాల్‌ను పూర్తిగా నివారించడం మంచిది.
9. వైద్య సలహాను పొందండి: మీ ఆల్కహాల్ వినియోగం మరియు మీ కాలేయంపై దాని ప్రభావం గురించి మీరు ఆందోళన చెందుతుంటే, వైద్య నిపుణులను సంప్రదించండి. వారు అవసరమైన విధంగా మార్గదర్శకత్వం, మద్దతు, పర్యవేక్షణను అందించగలరు.
