తెలంగాణలోని సిద్దిపేట జిల్లా మార్కుక్ మండలంలో ఉన్న కొండ పోచమ్మ సాగర్ రిజర్వాయర్ కేవలం ఒక నీటిపారుదల ప్రాజెక్ట్ మాత్రమే కాదు, హైదరాబాద్ నగరానికి సమీపంలో ఉన్న ఒక ప్రశాంతమైన, ఆహ్లాదకరమైన పర్యాటక కేంద్రం. కాళేశ్వరం ఎత్తిపోతల పథకంలో ముఖ్యమైన భాగమైన ఈ జలాశయం, చుట్టూ కొండలు, ప్రశాంతమైన నీటితో కనువిందు చేస్తుంది.

హైదరాబాద్ నుండి ఆహ్లాదకరమైన ప్రయాణం

హైదరాబాద్ నుండి దాదాపు 50 కిలోమీటర్ల దూరంలో ఉన్న కొండ పోచమ్మ సాగర్‌కు ప్రయాణం చాలా ఆహ్లాదకరంగా ఉంటుంది. మంచి రోడ్డు మార్గం, చుట్టూ పచ్చదనం… నగర జీవితంలోని ఒత్తిడి నుంచి ఉపశమనం పొందాలనుకునే వారికి ఇది ఒక సరైన వీకెండ్ గెట్‌అవే. మీరు సొంత వాహనంలో వెళ్లినా లేదా బైక్ రైడ్ ప్లాన్ చేసినా, ఈ జలాశయం మిమ్మల్ని మైమరపిస్తుంది.

హైదరాబాద్ నుంచి వెళ్లడానికి రెండు మార్గాలు ఉంటాయి. ఒకటి షామీర్‌పేట్, గౌరారం, మీదుగా వెళ్లడం. ఇంకొకటి కొల్తూరు, అనంథారం మీదుగా వెళ్లడం. షామీర్‌పేట్, గౌరారం హైవే. ఇక కొల్తూరు, అనంథారం మీదుగా వెళ్లే దారి పల్లెలు, పంటల మధ్య నుంచి వెళుతుంది.

కళ్ళకు విందు చేసే దృశ్యాలు

ఈ జలాశయం సుమారు 15 టీఎంసీల నీటిని నిల్వ చేసే సామర్థ్యాన్ని కలిగి ఉంది. ఇక్కడ పర్యాటకులు ముఖ్యంగా ఆనందించే అంశాలు:

• జలాశయ దృశ్యం: విశాలమైన నీటి మడుగు, నీలి ఆకాశాన్ని ప్రతిబింబిస్తూ కళ్ళకు అద్భుతమైన విందునిస్తుంది. సాయంకాలం సూర్యాస్తమయం (Sunset) సమయంలో ఈ దృశ్యం మరింత మనోహరంగా ఉంటుంది.

• చుట్టూ పచ్చదనం: రిజర్వాయర్ చుట్టూ కొండలు, పచ్చటి పొలాలు, చెట్లు పర్యావరణ ప్రేమికులను ఆకర్షిస్తాయి. ఇక్కడ స్వచ్ఛమైన గాలి మరియు ప్రశాంతత లభిస్తుంది.

• పక్షి వీక్షణం (Bird Watching): ప్రశాంతమైన వాతావరణం కారణంగా, ఇక్కడ అప్పుడప్పుడు వివిధ రకాల పక్షులను కూడా వీక్షించే అవకాశం ఉంది.

సందర్శించదగిన ఇతర ప్రదేశాలు

కొండ పోచమ్మ సాగర్‌ను సందర్శించినప్పుడు చుట్టుపక్కల చూడదగిన కొన్ని ముఖ్యమైన ప్రదేశాలు:

• కొండ పోచమ్మ దేవాలయం: రిజర్వాయర్‌కు సమీపంలోనే పురాతనమైన కొండ పోచమ్మ దేవాలయం ఉంది. భక్తులు ఇక్కడ అమ్మవారిని దర్శించుకోవచ్చు.

• అంజనేయ స్వామి ఆలయం: మార్గమధ్యంలో ఉన్న ఈ అద్భుతమైన నిర్మాణ శైలి కలిగిన ఆలయం ప్రశాంతంగా ఉంటుంది.

• కొమురవెళ్లి దేవస్థానం: ఇంకొంత దూరం వెళ్లాలనుకుంటే కొమురవెళ్లి మల్లన్నను కూడా దర్శించుకోవచ్చు. లేదా ఉదయమే నేరుగా కొమురవెళ్లి దేవస్థానం సందర్శించుకుని వచ్చే టప్పుడు కొండ పోచమ్మ దేవాలయం, కొండ పోచమ్మ సాగర్ సందర్శించవచ్చు. సాయంత్రం వేళ అంటే సుమారు 4 నుంచి 6 మధ్య రిజర్వాయర్ అందాలను ఆస్వాదించవచ్చు.

పర్యాటకులకు ముఖ్య సూచనలు

కొండ పోచమ్మ సాగర్ ఒక ఇంజనీరింగ్ అద్భుతమే అయినప్పటికీ, ఇది ప్రధానంగా తాగు మరియు సాగు నీటి కోసం నిర్మించిన జలాశయం. ఇక్కడ పర్యాటకులు గుర్తుంచుకోవాల్సిన కొన్ని ముఖ్య విషయాలు:

• సమయపాలన: సందర్శన సమయాలు సాధారణంగా ఉదయం 6:00 AM నుండి సాయంత్రం 6:00 PM వరకు ఉంటాయి. ఆలస్యంగా వెళ్లకుండా చూసుకోవాలి.

• భద్రత ముఖ్యం: జలాశయం లోతుగా ఉంటుంది, కాబట్టి ప్రమాదాలు జరగకుండా నీటిలోకి దిగడం లేదా ఈత కొట్టడం వంటివి చేయకూడదు.

• పరిశుభ్రత: పర్యావరణాన్ని కాపాడేందుకు రిజర్వాయర్ పరిసరాలను శుభ్రంగా ఉంచాలి.

• కొండ పోచమ్మ సాగర్ డ్యామ్ మీదకు వాహనాల అనుమతి లేదు. పార్కింగ్ ప్లేస్ లో పార్కింగ్ చేసుకుని పైకి నడిచి వెళ్లి చూసి రావడమే. వాహనాలు పైకి తీసుకెళితే రూ. 10 వేల జరిమానా చెల్లించాల్సి వస్తుంది.
• ఇక్కడికి సమీపంలో హోటళ్లు, రెస్లారెంట్లు ఏవీ ఉండవు. ఐదారు కిలోమీటర్ల దూరంలో గౌరారం వెళ్లి తినాలి. చిన్న చిన్న తినుబండారాలు మాత్రం లభ్యమవుతాయి.

కొండ పోచమ్మ సాగర్ కేవలం నగరానికి దగ్గరగా ఉండి, ప్రకృతిని ఆస్వాదించడానికి, మానసిక ప్రశాంతతను పొందడానికి అనువైన ఒక చక్కటి ప్రదేశం.