Cauliflower Pickle recipe: కాలీఫ్ల‌వ‌ర్‌తో పెట్టే నిల్వ పచ్చడి అద్భుతంగా ఉంటుంది. కాలీఫ్లవర్ అవకాయ పచ్చడి రెసిపీ చేయడం చాలా సులువు. కాలీఫ్ల‌వ‌ర్‌తో ఎప్పుడూ కూర‌లే కాదుగా అప్ప‌డప్పుడు ఇలా ప‌చ్చ‌డి చేస్తేనే క‌దా.. దాని రుచేంటో తెలిసేది. మీ కోసం ఈ  రెసిపీని అందిస్తున్నాం. ఒక్క‌సారి ట్రై చేయండి. ఎంతో క‌మ్మ‌గా ఉంటుంది. కాలీఫ్లవర్ ఆవకాయ పచ్చడి రెసిపీ త‌యారీ విధానం ఇక్క‌డ చూసేయండి.

కాలీఫ్ల‌వ‌ర్ నిల్వ ప‌చ్చ‌డికి కావ‌ల‌సిన ప‌దార్థాలు:

1. కాలీఫ్లవర్ – మూడు
2. ఆవాలు – ఒక టేబుల్ స్పూన్
3. మెంతులు – ఒక టేబుల్ స్సూన్
4. వెల్లులి రెబ్బలు – ప‌ది రెబ్బ‌లు
5. కారం – పావు క‌ప్పు
6. వేరుశెనగ నూనె లేదా ఆవనూనె –  అర క‌ప్పు
7. ఉప్పు – రెండు  స్సూన్లు
8. నిమ్మ‌ర‌సం – రెండు స్సూన్లు

కాలీఫ్లవర్‌ నిల్వ పచ్చడి తయారీ విధానం

1. ముందుగా కాలీఫ్లవర్‌ను మీడియం సైజు ముక్క‌లుగా తీసుకుని ఒక గిన్నె నీళ్లలో  కొద్దిగా ఉప్పు వేసుకుని శుభ్రంగా క‌డిగి నీటిని వ‌డ‌గ‌ట్టి 3 గంట‌ల పాటు ఎండ‌లో ఆర‌నివ్వండి.
2. ఇప్పుడు ఆవాలు, మెంతుల‌ను దోర‌గా వేయించి గ్రైండ్ చేసుకుని ప‌క్క‌న పెట్టుకోండి.
3. వెడల్పాటి పాన్‌లో కావలసిన మొత్తంలో నూనెను వేడి చేసి, అందులో ఆరబెట్టిన కాలీఫ్లవర్‌ ముక్కలను వేసి, మీడియం నుంచి అధిక మంటపై 2 నుండి 3 నిమిషాలు వేయించాలి. దోర‌గా వ‌చ్చిన త‌ర్వాత తీసి ప‌క్క‌న పెట్టుకోవాలి.
4. ఆపై వేయించిన కాలీఫ్ల‌వ‌ర్ ముక్క‌లలో ముందుగా గ్రైండ్ చేసుకున్న ఆవాలు, మెంతి పొడిని వేయాలి.
5. ఒక‌సారి క‌లుపుకున్న త‌ర్వాత అందులో కారం, ఉప్పు, వెల్లుల్లి రెబ్బ‌లు, వేసి మ‌ళ్లీ ఒక‌సారి బాగా క‌లుపుకోవాలి.
6. ఆ త‌ర్వాత పావు క‌ప్పు నూనెను వేడి చేసి చ‌ల్లారిన తర్వాత  ఆ మిశ్ర‌మంలో వేయాలి. అందులోనే నిమ్మ‌ర‌సం కూడా క‌లుపుకోవాలి.
7. అంతే  కాలీఫ్లవర్ అవకాయ రెడీ. ఈ ప‌చ్చ‌డిని రెండు రోజులు ఊర‌బెట్టిన త‌ర్వాత తింటే భ‌లే మ‌జాగా ఉంటుంది. క‌మ్మ‌ని విందుభోజ‌నం తిన్న‌ట్టే ఉంటుంది. అంతేకాదు ఇది నెల‌రోజుల వ‌ర‌కూ కూడా తాజాగా ఉంటుంది. ఇంత సులువుగా చేసుకునే ప‌చ్చ‌డిని మీరూ కూడా ట్రై చేసేయండి.

– లక్ష్మీ నెక్కల, ఫ్రీలాన్స్ జర్నలిస్ట్